…………………
ఇరాన్లో సుప్రీం నేత అయతొల్లా ఖొమేనీ అమలు చేస్తున్న కఠిన మత ఛాందసవాద పాలనపై ప్రజల్లో తీవ్ర అసంతృప్తి వ్యక్తమవుతోంది. ముఖ్యంగా మహిళలు, యువత ఈ ఆంక్షలకు విసిగి బహిరంగంగా తిరుగుబాటు చేస్తున్నారు. దేశవ్యాప్తంగా పలు నగరాల్లో నిరసనలు, ర్యాలీలు, నినాదాలతో పరిస్థితి ఉద్రిక్తంగా మారింది.
………….
ఇటీవల జరిగిన అల్లర్లలో వందల మంది ప్రాణాలు కోల్పోయినట్లు మానవహక్కుల సంస్థలు చెబుతున్నాయి. భద్రతా దళాల కాల్పులు, లాఠీచార్జీలు, అరెస్టుల వల్ల పరిస్థితి మరింత తీవ్రంగా మారింది. వేలాది మందిని పోలీసులు అదుపులోకి తీసుకున్నారు. పలువురు యువకులు, యువతులను జైళ్లకు తరలించారు. కొందరిపై దేశద్రోహం కేసులు పెట్టి కఠిన శిక్షలు విధిస్తామని ప్రభుత్వం హెచ్చరిస్తోంది.
…………
ఇరాన్లో ఛాందసవాద పాలన కింద మహిళలపై తీవ్రమైన ఆంక్షలు అమలులో ఉన్నాయి.
బహిరంగ ప్రదేశాల్లో తప్పనిసరిగా హిజాబ్ ధరించాలి.
తలపై దుప్పట్టు సరిగా లేకపోయినా, దుస్తులు “సంప్రదాయానికి విరుద్ధంగా” ఉన్నాయని భావించినా మోరాలిటీ పోలీసులు అరెస్ట్ చేస్తారు.
విద్య, ఉద్యోగం, ప్రయాణం, వినోదం వంటి విషయాల్లో కూడా అనేక పరిమితులు ఉన్నాయి. పురుషుల అనుమతి లేకుండా పాస్పోర్ట్, ప్రయాణం వంటి హక్కులు కూడా పూర్తిగా లేవు. చిన్న తప్పులకు కూడా జైలు, జరిమానాలు, కొరడా దెబ్బలు వంటి శిక్షలు విధించే పరిస్థితి ఉంది.
……
ప్రస్తుతం టెహ్రాన్ సహా అనేక ప్రధాన నగరాల్లో మహిళలు హిజాబ్ చట్టానికి వ్యతిరేకంగా వీధుల్లోకి వస్తున్నారు. విద్యార్థులు, ఉద్యోగులు కూడా వారికి మద్దతుగా నిరసనల్లో పాల్గొంటున్నారు. “స్వేచ్ఛ కావాలి, సమాన హక్కులు కావాలి” అంటూ నినాదాలు చేస్తున్నారు. ప్రభుత్వ వ్యతిరేక నినాదాలతో వీధులు మార్మోగుతున్నాయి.
……….
ప్రభుత్వం మాత్రం భద్రతా బలగాలను పెద్ద సంఖ్యలో మోహరించింది. ఇంటర్నెట్ సేవలను నిలిపివేయడం, సోషల్ మీడియాను నియంత్రించడం, నిరసనకారుల ఇళ్లపై దాడులు చేయడం వంటి చర్యలు తీసుకుంటోంది. నిరసనల్లో పాల్గొంటే కఠిన శిక్షలు తప్పవని అధికార యంత్రాంగం బెదిరిస్తోంది.
