ఇటీవల జరిగిన పార్లమెంట్ ఎన్నికల ఘట్టం ముగిసిందని, దానిమీద అనవసరపు చర్చ అవసరం లేదు ఆర్ఎస్ఎస్
సర్ సంఘ ఛాలక్ డాక్టర్ మోహన్ జి భగవత్ అభిప్రాయపడ్డారు. ప్రజాస్వామ్యంలో ఎన్నికలు ఒక ప్రక్రియ మాత్రమే అని, అదేమీ యుద్ధం కాదని ఆయన స్పష్టం చేశారు. దేశం పునర్ వైభవం సాధించేందుకు సంఘ కార్యకర్తలు పునర్ అంకితం కావాలని ఆయన పిలుపు ఇచ్చారు.
నాగపూర్ వేదికగా నిర్వహించిన కార్యకర్తల. వికాస వర్గ ముగింపు కార్యక్రమంలో అతిథిగా పాల్గొన్నారు. అక్కడినుంచి స్వయం సేవకులకు దిశా నిర్దేశం చేశారు.
ఇటీవలి లోక్‌సభ ఎన్నికలపై వ్యాఖ్యానిస్తూ, ఎన్నికల ఫలితాలపై అనవసర చర్చలకు తావీయవద్దని సూచించారు. “ఆర్ఎస్ఎస్ కైసే హువా, క్యా హువా వంటి చర్చలలో పాల్గొనదు. ఓటు ఆవశ్యకతపై అవగాహన కల్పించడం మాత్రమే మేము మా కర్తవ్యం చేస్తాము. .” అని తెలిపారు. అధికార పక్షం, ప్రతిపక్షాల మధ్య ఏకాభిప్రాయం సాధించి ఉమ్మడి ప్రయోజనాల కోసం పని చేయాలని డా. భగవత్ పిలుపునిచ్చారు.
“ఎన్నికలు మెజారిటీ సాధించడం కోసమే. ఇది పోటీ తప్ప యుద్ధం కాదు” అని హితవు చెప్పారు. రాజకీయ పార్టీలు, నాయకులు పరువు నష్టం కలిగించే వాక్చాతుర్యాన్ని కలిగి ఉన్నారని భగవత్ విమర్శించారు. ఇది సమాజంలో చీలికలు సృష్టించగలదని ఆయన హెచ్చరించారు. “రాజకీయ పార్టీలు, నాయకులు ఒకరినొకరు చెడుగా మాట్లాడుకోవడం వర్గాల మధ్య చీలికలకు కారణమవుతుందని పరిగణనలోకి తీసుకోవడం లేదు,” అని ఆయన విచారం వ్యక్తం చేశారు.
ఎటువంటి కారణం లేకుండా ఇటువంటి వివాదాలలోకి ఆర్‌ఎస్‌ఎస్‌ను కూడా ఎలా లాగుతారని ఆయన విస్మయం వ్యక్తం చేశారు. “ఎన్నికల్లో ఎప్పుడూ రెండు పక్షాలు ఉంటాయి. కానీ గెలవడానికి అబద్ధాలను ఆశ్రయించకుండా గౌరవంగా వ్యవహరించాలి” అంటూ నేటి నాయకుల వ్యవహారంపై సున్నితంగా అసంతృప్తి వ్యక్తం చేశారు. డీప్‌ఫేక్‌లను ప్రస్తావిస్తూ అసత్య ప్రచారం చేసేందుకు టెక్నాలజీని దుర్వినియోగం చేయడంపై ఆందోళన వ్యక్తం చేశారు.
భారతీయ సమాజం ఒకరి ఆరాధనా విధానాన్ని ఒకరు గౌరవించుకుంటూ ఐక్యంగా ముందుకు సాగాలని ఆర్ఎస్ఎస్ అధినేత సూచించారు. “భారత సమాజం వైవిధ్యమైనది. కానీ అది ఒకే సమాజమని అందరికీ తెలుసు. వారు దాని వైవిధ్యాన్ని కూడా అంగీకరిస్తారు” అని ఆయన తెలిపారు. చారిత్రక అన్యాయాలు ప్రజల మధ్య దూరాలను సృష్టించాయని, వాటిని తొలగించాల్సిన అవసరం ఉందని ఆయన స్పష్టం చేశారు.
‘విదేశీ సిద్ధాంతాల’ ప్రభావాన్ని ప్రస్తావిస్తూ “దండయాత్రదారులు భారతదేశానికి వచ్చి వారితో పాటు వారి భావజాలాన్ని తీసుకువచ్చారు. కొంతమంది దీనిని అనుసరించారు. అయితే ఈ భావజాలం వల్ల దేశ సంస్కృతి ప్రభావితం కాకపోవడం మంచిది” అని డా. భగవత్ సూచించారు. అతను ఇస్లాం మరియు క్రైస్తవ మతం వంటి మతాలలో మంచితనం, మానవత్వాన్ని స్వీకరించాలని ఆయన చెప్పారు.
అన్ని విశ్వాసాల అనుచరులు ఒకరినొకరు సోదరులు, సోదరీమణులుగా గౌరవించాలని తెలిపారు. ఈ దేశం మనదని, ఈ నేలపై పుట్టినవారంతా మన సొంతమని విశ్వసిస్తూ ప్రతి ఒక్కరూ ముందుకు సాగాలని డా. భగవత్ పిలుపిచ్చారు. విదేశీ సిద్ధాంతాలే నిజమనే నమ్మకాన్ని విడనాడాలని ఆయన స్పష్టం చేశారు. గతాన్ని మరచిపోయి అందరినీ సొంతంగా స్వీకరించాల్సిన అవసరాన్ని ప్రస్తావిస్తూ కులతత్వాన్ని పూర్తిగా నిర్మూలించాలని పిలుపునిచ్చారు
సామాజిక సామరస్యానికి కృషి చేయాలని ఆర్ఎస్ఎస్ కార్యకర్తలను ఆయన కోరారు. తుపాకీ సంస్కృతి, కుటుంబ విలువలు, సాంస్కృతిక పరిరక్షణ, వాతావరణ సమస్యలు, పర్యావరణ పరిరక్షణ వంటి అనేక ఇతర అంశాలను కూడా ఆయన ఈ సందర్భంగా స్పృశించారు.
మణిపూర్లో హింస ఇంకా చల్లారక పోవడంపై డాక్టర్ భాగవత్ ఆందోళన వ్యక్తం చేశారు. త్వరలోనే అక్కడ శాంతియుత వాతావరణం నెలకొనాలని అభిలషించారు..
