ఉక్రెయిన్-రష్యా యుద్ధం ఫలితంగా మేడ్ ఇన్ ఇండియా వందే భారత్ ఎక్స్‌ప్రెస్ రైలుకు భారతీయ వీల్స్
వాడనున్నారు. ఈ సెమీ-హై స్పీడ్ రైలుని భారతదేశంలో రూపొందించారు. దాని చక్రాలు ఉక్రెయిన్ నుంచి దిగుమతి చేసుకోవడానికి ప్రణాళిక చేశారు, కానీ ఉక్రెయిన్‌పై రష్యా దండయాత్ర కొనసాగుతున్నందున దిగుమతిని నిలిపివేసింది, రైల్వేలు భారతదేశంలో అత్యవసరంగా వీల్స్ తయారు చేయవలసి వచ్చింది.
బెంగళూరులోని రైల్వే వీల్ ఫ్యాక్టరీ వీటిని తయారు చేస్తోంది. ఇప్పటికే టెండర్లు జారీ చేసింది. ఫ్యాక్టరీ ఇప్పటికే చక్రాల కోసం ఆక్సెల్‌లను తయారు చేస్తోంది, ఇప్పుడు చక్రాలను కూడా తయారు చేయనుంది. 128 చక్రాల మొదటి బ్యాచ్ ఇప్పటికే ఉక్రెయిన్‌లో తయారయ్యాయి, అయితే అవి యుద్ధం కారణంగా రొమేనియాలో చిక్కుకున్నాయి. ఇప్పుడు వాటిని భారతదేశానికి తీసుకురావడానికి ప్రయత్నాలు జరుగుతున్నాయి, ఉక్రెయిన్ తయారు చేసిన వీల్స్ ఈ నెలాఖరులో భారతదేశానికి ఎయిర్-లిఫ్ట్ చేస్తారని భావిస్తున్నారు. ఈ చక్రాలను మే 15 నుంచి 20 మధ్య బ్యాచ్‌ల వారీగా చెన్నైకి తీసుకువస్తారు, ఆపై వందే భారత్ రైలు సెట్‌లను అసెంబ్లింగ్ చేస్తున్న చెన్నైలోని ఇంటిగ్రల్ కోచ్ ఫ్యాక్టరీ (ICF)కి తీసుకువెళతారు. ఒక వందే భారత్ రైలుకు 128 చక్రాలు సరిపోతాయి, ఎందుకంటే రైలులో 16 కోచ్‌లు ఉంటాయి, ఒక్కో రైల్వే కోచ్ 8 చక్రాలతో నడుస్తుంది.
రొమేనియాలో చిక్కుకున్న ఉక్రెయిన్ నుంచి 128 చక్రాలు కాకుండా, మరో రెండు విదేశీ కంపెనీలతో ఆర్డర్ చేసిన ఇతర వీల్స్ కూడా వచ్చే నెలలో భారతదేశానికి చేరుకుంటాయి. ఈ చక్రాలు వందే భారత్ ఎక్స్‌ప్రెస్ రైళ్ల కొత్త వెర్షన్ 2 ట్రయల్ కోసం.. ఆ తర్వాత భారతీయ రైల్వేలు ఆర్డర్ చేసిన రైళ్ల కోసం ఉపయోగిస్తారు. ఆ తర్వాత ఉక్రెయిన్‌లో తయారీ ఆగిపోవడంతో భారతీయ ప్లాంట్‌లో తయారు చేసి వాడనున్నారు.
వచ్చే ఏడాది ఆగస్టు 15 నాటికి 75 వందే ఎక్స్‌ప్రెస్ రైళ్లకు సరిపడా చక్రాలు మాత్రమే కాకుండా, భవిష్యత్తులో రైళ్ల ఉత్పత్తి చేయడానికి మిగులు చక్రాలను కూడా కలిగి ఉండటమే లక్ష్యమని అధికారులు తెలిపారు. రైల్వే వీల్ ఫ్యాక్టరీ ద్వారా 2-3 నెలల్లో అవసరమైన సంఖ్యలో చక్రాలు తయారు చేస్తాం. బెంగళూరులోని యలహంకలోని రైల్వే వీల్ ఫ్యాక్టరీ ప్రస్తుతానికి ఈ చక్రాలకు ప్రాధాన్యత ఇవ్వనుంది. రైళ్ల కోసం మొత్తం 36,000 వీల్స్ ఆర్డర్ చేశారు.
ప్రస్తుతం ఢిల్లీ, వారణాసి, ఢిల్లీ, వైష్ణో దేవి కొలువైన కాట్రా మధ్య మాత్రమే వందేభారత్ ఎక్స్‌ప్రెస్ రైళ్లు నడుస్తున్నాయి. ఈ సంవత్సరం నుంచి, రైలు వెర్షన్-2 ను అనేక ఇతర మార్గాలలో ప్రారంభించనున్నారు. ప్రస్తుతం భారతీయ రైల్వేలు తమకు అవసరమైన దాదాపు 60-70% చక్రాలను విదేశాల నుంచి దిగుమతి చేసుకుంటాయి, అయితే ఉక్రెయిన్ యుద్ధం తర్వాత ఆ గణాంకాలలో మార్పు రావచ్చు.
రైలు చక్రాల తయారీ అనేది ఒక ప్రత్యేక ప్రక్రియ, ప్రపంచవ్యాప్తంగా కొన్ని ప్లాంట్ లు మాత్రమే వాటిని తయారు చేస్థాయి. చక్రాలు ఒక స్టీల్ ముక్క నుంచి తయారు చేస్తారు, దాన్ని అధిక ఉష్ణోగ్రతలో వేడి చేస్తారు, ఆపై వాటిని చక్రం ఆకారాన్ని ఇవ్వడానికి ఒత్తిడి చేస్తారు. ఇటువంటి ఫోర్జింగ్ టెక్నిక్ చాలా బలమైన చక్రాలను ఉత్పత్తి చేస్తుంది.
వచ్చే మూడేళ్లలో 400 వందే భారత్ రైళ్లను ప్రవేశపెడతామని మొన్నటి బడ్జెట్ సందర్భంగా ఆర్థికమంత్రి నిర్మలాసీతారామన్ ప్రకటించారు. ఆగస్టు 2023 నాటికి 75 రైళ్లను ప్రవేశపెట్టాలని ప్రభుత్వం యోచిస్తోంది. అధునాతన రైళ్లను మోహరించేందుకు రైల్వే ఇప్పటికే మార్గాలను గుర్తించడం ప్రారంభించింది. చాలా రూట్లలో, వందే భారత్ రైళ్లలో కేవలం చైర్ కార్లు మాత్రమే ఉన్నందున, ప్రారంభంలో వందే భారత్ రైళ్లు ఇప్పటికే ఉన్న శతాబ్ది, జన శతాబ్ది రైళ్లను భర్తీ చేస్తాయి. అయితే రాజధాని ఎక్స్‌ప్రెస్ అలాంటి సుదూర రైళ్ల స్థానంలో కోచ్‌ల స్లీపర్ వెర్షన్‌లను అభివృద్ధి చేయడానికి రైల్వే ఇప్పటికే ప్రక్రియను ప్రారంభించింది.
వందే భారత్ రైలు వెర్షన్ 3గా ఉండే 200 రైళ్ల అభివృద్ధికి టెండర్లు ఇప్పటికే ఆహ్వానించారు. ఈ రైళ్లలో రాజధాని ఎక్స్‌ప్రెస్ రైళ్ల మాదిరిగానే AC-3 టైర్, AC-2 టైర్ సహా AC-1వ తరగతి కోచ్‌లు ఉంటాయి. అలాంటి 3200 కోచ్‌ల కోసం బిడ్లను ఆహ్వానించారు.
