సరిహద్దుల్లో ఉగ్రవాదాన్ని ప్రోత్సహిస్తున్న పాకిస్తాన్కు బుద్ధి చెప్పే దిశగా భారత్ మరో కీలక ముందడుగు వేసింది. రావి నదిపై దశాబ్దాలుగా పెండింగ్లో ఉన్న షాపుర్ కండి డ్యామ్ నిర్మాణాన్ని పూర్తి చేసి, పాకిస్తాన్కు వెళ్లే అదనపు నీటిని పూర్తిగా నిలిపివేయడానికి రంగం సిద్ధమైంది. ఈ ఏడాది మార్చి 31, 2026 నాటికి ఈ ప్రాజెక్టు పనులు పూర్తవుతాయని అధికారిక వర్గాలు ధృవీకరించాయి.
………..
1979లో అడుగులు పడి, 1995లో శంకుస్థాపన జరిగినప్పటికీ.. పంజాబ్, జమ్మూ కాశ్మీర్ రాష్ట్రాల మధ్య వివాదాలు, గత ప్రభుత్వాల ఉదాసీనత వల్ల ఈ ప్రాజెక్టు 40 ఏళ్లకు పైగా నిలిచిపోయింది. అయితే, ప్రధాని నరేంద్ర మోదీ చొరవతో 2018లో రాష్ట్రాల మధ్య సయోధ్య కుదిరి, దీనికి ‘జాతీయ ప్రాజెక్టు’ హోదా లభించింది. మోదీ ప్రభుత్వం యుద్ధప్రాతిపదికన నిధులు కేటాయించడంతో ఈ ప్రాజెక్టు ఇప్పుడు వాస్తవరూపం దాల్చుతోంది.
…………
సింధు నదీ జలాల ఒప్పందం ప్రకారం రవి, బియాస్, సట్లెజ్ నదులపై భారత్కు పూర్తి హక్కులు ఉన్నప్పటికీ, సరైన డ్యామ్లు లేక మన నీరు పాకిస్తాన్కు వృథాగా వెళ్లేది.
జల దిగ్బంధం: షాపుర్ కండి డ్యామ్ పూర్తి కావడంతో, పాకిస్తాన్కు వెళ్లే సుమారు 1150 క్యూసెక్కుల అదనపు నీరు నిలిచిపోతుంది.
వ్యవసాయానికి ఊతం: ఈ నీటితో జమ్మూ కాశ్మీర్లోని కథువా, సాంబా జిల్లాల్లోని 32,000 హెక్టార్ల ఎండిపోయిన భూములకు, అలాగే పంజాబ్లోని 5,000 హెక్టార్లకు సాగునీరు అందుతుంది.
విద్యుత్ ఉత్పత్తి: ఈ ప్రాజెక్టు ద్వారా దాదాపు 206 మెగావాట్ల జలవిద్యుత్ కూడా ఉత్పత్తి కానుంది.
………….
గతేడాది పహల్గామ్ ఉగ్రదాడి తర్వాత భారత్ తన వైఖరిని కఠినతరం చేసింది. “రక్తం, నీరు కలిసి ప్రవహించలేవు” అన్న ప్రధాని మోదీ నినాదానికి అనుగుణంగా, పాకిస్తాన్ను ఆర్థికంగా, వ్యూహాత్మకంగా దెబ్బతీసేందుకు జలవనరులను భారత్ సమర్థవంతంగా వినియోగించుకుంటోంది. వేసవి కాలం ప్రారంభమయ్యే లోపే ఈ డ్యామ్ పూర్తి కానుండటం పాకిస్తాన్ వ్యవసాయ రంగానికి పెద్ద దెబ్బ కానుంది.
