దేశ వ్యాప్తంగా నరేంద్ర మోడీ నాయకత్వం మీద చర్చ నడుస్తోంది. ప్రధానమంత్రిగా పది సంవత్సరాలు పరిపాలన చేశాక ఆయన ఎన్నికల్లో ఎదుర్కొన్నారు. ఈసారి 400 సీట్లు సాధించాలని టార్గెట్ పెట్టుకున్న బిజెపి 240 దగ్గరే ఆగిపోయింది.
దీంతో దేశవ్యాప్తంగా నరేంద్ర మోడీ నాయకత్వం మీద చర్చ నడుస్తోంది. పశ్చిమ బెంగాల్ ముఖ్యమంత్రి మమత బెనర్జీ వంటి ప్రతిపక్ష నాయకులు ఒక అడుగు ముందుకేసి.. నరేంద్ర మోడీ పక్కకు తప్పుకోవాలి అని డిమాండ్ చేస్తున్నారు. బిజెపి బలం తగ్గిందని కొత్త వాదాన్ని తెరమీదకి తీసుకొచ్చారు. దీని మీద సోషల్ మీడియాలో కూడా బాగా ప్రచారం జరుగుతోంది. ప్రతిపక్షాలతో పాటుగా బిజెపి నాయకులు కార్యకర్తలు అభిమానులు కూడా చాలావరకు డీలపడ్డారు.
ఇక్కడ ఒక విషయం గమనించాలి. గత ఎన్నికలతో పోల్చుకుంటే ఈ ఎన్నికల్లో బిజెపి ఓటు బ్యాంకు దాదాపుగా అలాగే నిలిచింది. 2019లో బిజెపి ఓటు శాతం 37.3% కాగా ఈసారి 36.6% దగ్గర ఆగిపోయింది అంటే తేడా ఒక్క శాతం కూడా లేదు 0.7% మాత్రమే తేడా. అయితే సీట్ల లెక్కను చూసుకుంటే మాత్రం భారీగా గండి పడింది. అయ్యా రాష్ట్రాల్లోని స్థానిక పరిస్థితుల దృష్ట్యా ప్రతిపక్ష పార్టీలు కలిసికట్టుగా పోటీకి దిగాయి దీంతో ఉత్తర ప్రదేశ్ మహారాష్ట్ర వంటి చోట్ల ఓటు శాతం అలాగే ఉన్న సీట్లు మాత్రం కోల్పోవడం జరిగింది. 2019లో 303 సీట్లు సాధించిన బిజెపి ఇప్పుడు మాత్రం 240 కి పరిమితం అయింది.
ఇక్కడ కాంగ్రెస్ పార్టీ పరిస్థితి చూస్తే ఇంకా విచిత్రంగా కనిపిస్తుంది. కాంగ్రెస్ పార్టీ 2019లో 19.5% ఓట్లు సాధించగా ఈసారి 21.2% ఓట్లు దక్కించుకొంది. అంటే 1.7% ఓట్లు పెరిగాయన్నమాట. ఓటు బ్యాంకు చాలా చాలా స్వల్పంగా పెరిగినప్పటికీ ఇతర పార్టీలతో పొత్తుల రీత్యా రెట్టింపు సంఖ్యలో సీట్లను గెలుచుకుంది. 2019లో కేవలం 52 సీట్లకు పరిమితమైన కాంగ్రెస్ ఈసారి 99 సీట్లు దక్కించుకొంది.
అందుచేత ఈ వాస్తవాన్ని గమనించి దేశంలో బిజెపి బలం కానీ నరేంద్ర మోదీ హవా కానీ ఏ మాత్రం తగ్గలేదు అని తెలుసుకోవాలి.
