కాంగ్రెస్ పార్టీ అధిష్టానం తీరు పట్ల చాలా కాలంగా అసంతృప్తితో ఉన్న కాంగ్రెస్ సీనియర్ నేత గులాం నబీ ఆజాద్ జమ్మూ కశ్మీర్లో పార్టీ కీలక పదవికి రాజీనామా చేశారు. పార్టీ ప్రచార కమిటీ చైర్మన్‌గా నియమితులైన కొద్దిసేపటికే ఆ పదవి నుంచి వైదొలిగారు. కాంగ్రెస్ పార్టీ జమ్మూ కశ్మీర్ రాజకీయ వ్యవహారాల కమిటీకి కూడా రాజీనామా చేశారు. ఆజాద్ ఇప్పటికే పార్టీ అఖిల భారత రాజకీయ వ్యవహారాల కమిటీలో సభ్యునిగా ఉన్నందున ఈ నియామకాన్ని హోదా తగ్గించడంగా భావించారని వర్గాలు సూచించాయి. జమ్మూ కశ్మీర్ సీఎంగా, కేంద్ర మంత్రిగా, కాంగ్రెస్ పార్టీలో అనేక కీలక పదవులను ఆజాద్ నిర్వర్తించారు. పార్టీలో సంస్థాగత మార్పులు కావాలని కోరుతూ రెండేళ్ల క్రితం సోనియాకు లేఖ రాసిన 23 మంది నేతల్లో ఆయన కూడా ఒకరు.
ఆజాద్ తన సన్నిహితుడు గులాం అహ్మద్‌ మీర్ ను పార్టీ జమ్మూ కాశ్మీర్‌ విభాగం చీఫ్‌ పదవి నుంచి తొలగించిన కొద్దిరోజులకే రాజీనామా చేశారు. మీర్ గత నెలలో పదవీవిరమణ చేశారు. మీర్ స్థానంలో వికార్ రసూల్ వానిని కాంగ్రెస్ అధిష్ఠానం నియమించింది. ప్రచార కమిటీ, రాజకీయ వ్యవహారాల కమిటీ, సమన్వయ కమిటీ, మేనిఫెస్టో కమిటీ, పబ్లిసిటీ అండ్ పబ్లికేషన్ కమిటీ, క్రమశిక్షణా కమిటీ సహా ప్రదేశ్ ఎన్నికల కమిటీని సోనియా గాంధీ తక్షణమే ఏర్పాటు చేసినట్లు పీటీఐ నివేదించింది. ఓటర్ల జాబితా ఖరారు, డీలిమిటేషన్ కసరత్తు పూర్తయిన తర్వాత జమ్మూ కాశ్మీర్‌లో అసెంబ్లీ ఎన్నికలు జరగనున్నాయి. ఎన్నికలకు గడువు ఇంకా ప్రకటించాల్సి ఉంది.
