“ఆదాని కి స్టేట్ బాంక్ ₹12770 కోట్ల రుణ మాఫీచేసింది” అని వార్త ఉన్న క్లిప్పింగ్ ఒకటి సోషల్ మీడియా బాగా చక్కర్లు కొడుతోంది.దురదృష్టం ఏమిటంటే ఆర్ధిక విషయాలు, ఆర్ధిక పరిభాష తెలియని కొందరు పత్రికారంగంలో ఉన్నారు లేదా ఆ పత్రికాధిపతులు వీళ్ళ చేత తప్పుడు వార్తలు రాయిస్తూ వార్తా వ్యభిచారానికి పాలు పడుతున్నారు అని అనుకోవాలి. పత్రికా రంగంలో ఉన్నంత మాత్రాన్న అన్ని తెలియాలి అని రూల్ ఏం లేదు. అందుకని నిజాయితీగా పనిచేసే వారు అయితే వార్తలు రాసేటప్పుడు ఆ వార్త విషయానికి సంబంధించిన పూర్తి సమాచారం సేకరించి దానిని వార్త లేదా వ్యాస రూపంలో పాఠకులకు అందించాలి. కానీ ఏదో రాజకీయ ఎజెండా పెట్టుకుని పత్రికలు నడిపేవారి పత్రికలలో అంత నిజాయితీ ఆశించడం నేతి బీరకాయలో నెయ్యి వెతకడం వంటిదే.
కానీ, నాకు ఆశ్చర్యం కలిగించే విషయం ఏమిటంటే ప్రింట్ ఎలక్ట్రానిక్ మీడియాలో వస్తున్న వార్తలను, వ్యాసాలను ఈ కాలంలో సోషల్ మీడియా శల్య పరీక్ష చేస్తున్నప్పుడే ఇంత నిర్లజ్జగా విషయాలను వక్రీకరించి వార్తలుగా ప్రజలకు అందచేస్తున్నారు అంటే సోషల్ మీడియా రాకముందు వీళ్ళని నమ్మిన పాఠకులకు ఎన్ని తప్పుడు వార్తలు వండి వడ్డించి నమ్మకద్రోహానికి పాలు పడ్డారో ?
ఇప్పుడు ఆదాని రైట్ ఆఫ్ వార్త గురించి :
ఆదాని కి స్టేట్ బాంక్ ₹12,770 కోట్లు రైట్ ఆఫ్ చేయలేదు, “అండర్ రైటింగ్” చేసింది.
బ్యాంకింగ్ రంగంలో అండర్ రైటింగ్ అంటే ఒక కస్టమర్ యొక్క ఋణ యోగ్యతను అంచనా వేయడం మరియు రుణాన్ని అందించాలా వద్దా అనే క్లిష్టమైన అంశాన్ని అంచనా వేస్తారు. బాంక్ వారు కస్టమర్ యొక్క రుణ చరిత్రను వారి గత ఆర్థిక రికార్డు, వారి ఖాతా లావాదేవీలు వివరాల స్టేట్‌మెంట్‌లు మరియు ఇతర ఆర్ధిక వివరాలతో పాటు తీసుకోబోయే ఋణానికి అందించే సెక్యూరిటీల విలువ మొదలగునవి అన్ని మదించి అంచనా వేస్తారు, అంతే తప్ప రుణం కూడా వెంటనే ఇవ్వరు.
ఇక రైట్ ఆఫ్ అంటే వసూలు కష్టంగా ఉన్న ఒక రుణాన్ని రిజర్వ్ బాంక్ మార్గదర్శకాలు ప్రకారం బాంక్ పుస్తకాలలో సర్దుబాటు లెక్కలు రాసుకోవడం. ఇక్కడ రుణం వసూలుకు తదుపరి చర్యలు ఉంటాయి.
కానీ వైవ్ ఆఫ్ అంటే పూర్తిగా రుణాన్ని మాఫీ చేయడం.
సో, ఇప్పుడు అండర్ రైటింగ్ కి రైట్ ఆఫ్ కి తేడా తెలిసింది అని అనుకుంటున్నాను.
…చాడా శాస్త్రి…
