పాత్రాచల్ భూ కుంభకోణం కేసులో శివసేన ఎంపీ సంజయ్ రౌత్ సతీమణి వర్షకు ఎన్‌ఫోర్స్‌మెంట్ డైరెక్టరేట్ సమన్లు జారీ చేసింది. సంజయ్ రౌత్ ను దర్యాప్తు సంస్థ అరెస్టు చేసిన కొద్ది రోజులకే ఆమెకు సమన్లు పంపింది. సబర్బన్ గోరేగావ్‌ లోని పాత్రాచల్ రీడెవలప్‌ మెంట్‌ లో ఆర్థిక అవకతవకలకు సంబంధించి సంజయ్ రౌత్ ను ఆదివారం అర్ధరాత్రి ఈడీ అరెస్టు చేసింది.
ఈ ఏడాది జనవరిలో పీఎంసీ బ్యాంకు కుంభకోణం కేసులో వర్షా రౌత్ ను ఈడీ ప్రశ్నించింది. మాధురీ ప్రవీణ్ రౌత్ నుంచి ఆమె ఖాతాకు జరిగిన రూ.55 లక్షల లావాదేవీకి సంబంధించి వర్షా రౌత్ ను విచారించారు. మనీలాండరింగ్ కేసులో సంజయ్ రౌత్ కు ఈరోజు ముంబై కోర్టు ఈడీ కస్టడీని ఆగస్టు 8 వరకు పొడిగించింది. కస్టడీని పొడిగిస్తూనే.. ఈడీ దర్యాప్తులో అద్భుతమైన పురోగతి సాధించిందని కోర్టు పేర్కొంది. మనీలాండరింగ్ నిరోధక చట్టంలోని సెక్షన్ 19లోని సబ్ సెక్షన్ (1) కింద సంజయ్ రౌత్ ను అరెస్టు చేశారు.
