స్వాతంత్య్ర సమరయోధుల మరణాలకు స్వాతంత్య్రానంతర కాంగ్రెస్ ప్రభుత్వమే కారణమని గోవా ముఖ్యమంత్రి ప్రమోద్ సావంత్ ఆరోపించారు. అలాగే విముక్తి ప్రాముఖ్యత కలిగిన స్మారక చిహ్నాలు, కోటలను పునరుద్ధరించి సుందరీకరిస్తామని ప్రకటించారు.
ఉత్తర గోవాలోని తెరెఖోల్ (తిరాకోల్) కోటలో హిర్వే గురూజీ, శేషనాథ్ వాడేకర్ జ్ఞాపకార్థం అమరవీరుల స్మారకాన్ని అప్‌గ్రేడ్ చేయడానికి సావంత్ మంగళవారం శంకుస్థాపన చేశారు.
మహారాష్ట్రకు చెందిన వారిద్దరూ 1955 ఆగస్ట్ 15న కోటపై జాతీయ జెండాను ఆవిష్కరించినందుకు వారిని పోర్చుగీసు వారు కాల్చి చంపారు. వారు గోవాను విముక్తి చేయడానికి ‘సత్యాఘ్ర’లో పాల్గొన్నారు.
“భారతదేశంలోని చాలా మంది స్వాతంత్య్ర సమరయోధులు గోవాకు పోర్చుగీసు నుంచి విముక్తి కావాలని భావించారు, అందుకే వారు పోర్చుగీసుకు వ్యతిరేకంగా పోరాడటానికి ఇక్కడకు వచ్చారు. అయితే అప్పటి కాంగ్రెస్ ప్రభుత్వం వారికి రక్షణ కల్పించలేకపోయింది. వారిని రక్షించడం కాంగ్రెస్ బాధ్యత’ అని సావంత్ అన్నారు.
“తెరేఖోల్ కోట వద్దకు వచ్చిన 127 మంది స్వాతంత్య్ర సమరయోధులందరినీ పోర్చుగీస్ వారు భారతదేశానికి తిరిగి వెళ్ళమని చెప్పారు. అయితే గోవాను విముక్తి చేయాలన్న తమ నిర్ణయంపై వారు గట్టిగా ఉన్నారు. వారిలో కొందరిని పోర్చుగీస్ వారు కాల్చి చంపారు. వారు గోవా విముక్తి కోసం తమ జీవితాన్ని త్యాగం చేశారు, కాబట్టి ఈ చరిత్రను తదుపరి తరానికి అందించాలి” అని సావంత్ అన్నారు.
“గోవా విముక్తి పోరాటంలో అమరవీరుల ధైర్యసాహసాలకు, త్యాగానికి ఎప్పటికీ రుణపడి ఉంటాం. ఈ స్మారకం భవిష్యత్తు తరాలకు జాతీయత విలువలను అలవర్చుకునేలా స్ఫూర్తినిస్తుంది” అని ఆయన అన్నారు. గోవా విముక్తిలో ప్రాముఖ్యత ఉన్న కాబో డి రామ కోట, బేతుల్ కోట సహా స్మారక చిహ్నాలను పునరుద్ధరించి సుందరంగా తీర్చిదిద్దుతామన్నారు.
ఆజాద్ గోమంతక్ దళ్, స్థానిక సాయుధ విప్లవ బృందం, నేషనల్ కాంగ్రెస్ (గోవా) సహా ఇతర స్వాతంత్య్ర సమరయోధుల రచనలను చరిత్ర పాఠ్యపుస్తకాలలో చేరుస్తామని సావంత్ ఇదివరకే చెప్పారు.
