పశ్చిమ బెంగాల్ మాజీ మంత్రి పార్థ ఛటర్జీ సన్నిహితురాలు అర్పితా ముఖర్జీకి చెందిన రెండో అపార్ట్‌మెంట్‌లో భారీ మొత్తంలో స్వాధీనం చేసుకున్న బంగారం విలువ రూ.4.31 కోట్లు అని ఎన్‌ఫోర్స్‌మెంట్ డైరెక్టరేట్ (ఈడీ) తెలిపింది. జూలై 27న బెల్గోరియాలోని అర్పితా ముఖర్జీ ఫ్లాట్ లో ఈడీ దాడులు చేసి రూ.27 కోట్ల నగదు, భారీ మొత్తంలో బంగారాన్ని స్వాధీనం చేసుకుంది.
అర్పితా ముఖర్జీ బెల్గోరియా నివాసం నుంచి 6580 గ్రాముల (24 క్యారెట్ల బంగారం) వస్తువులతో పాటు 1572 గ్రాముల (22 క్యారెట్ల బంగారం) వస్తువులను స్వాధీనం చేసుకున్నట్లు ఈడీ వర్గాలు వెల్లడించాయి.
ఛటర్జీ విద్యాశాఖ మంత్రిగా ఉన్నప్పుడు జరిగిన పశ్చిమ బెంగాల్ టీచర్ల రిక్రూట్‌మెంట్ స్కామ్‌పై దర్యాప్తులో డబ్బు జాడను వెలికితీసేందుకు ఏజెన్సీ ప్రయత్నిస్తోంది. గ్రూప్ ‘సి’ & ‘డి’ సిబ్బంది, IX-XII తరగతుల అసిస్టెంట్ టీచర్లు సహా ప్రైమరీ టీచర్ల రిక్రూట్‌మెంట్ స్కామ్‌లో ఛటర్జీ ప్రమేయం ఉన్నట్లు తేలింది. పార్థ ఛటర్జీ, అర్పితా ముఖర్జీలను ఈడీ అరెస్టు చేసి ఆగస్టు 5 వరకు కస్టడీకి పంపింది.
