పంజాబ్ లో ఫరీద్ కోట్‌ లోని బాబా ఫరీద్ యూనివర్శిటీ ఆఫ్ హెల్త్ సైన్సెస్ వైస్-ఛాన్సలర్ డాక్టర్ రాజ్ బహదూర్ ను పంజాబ్ ఆరోగ్య మంత్రి చేతన్ సింగ్ జౌరమజ్రా కెమెరా ముందే అవమానించారు. ఇది జరిగిన ఒక రోజు తర్వాత తన పదవికి డాక్టర్ రాజీనామా చేశారు. ఈ మేరకు ఆయన ఈరోజు రాష్ట్ర ప్రభుత్వానికి లేఖ కూడా రాశారు.
రాష్ట్ర ఆరోగ్య మంత్రి, ఆసుపత్రి వార్డులలో పరిశుభ్రత గురించి వచ్చిన ఫిర్యాదుల తర్వాత.. ప్రెస్, కెమెరామెన్‌ లతో కలిసి ప్రభుత్వ ఆసుపత్రిలోకి ప్రవేశించి, రోగుల కోసం ఒక పాడైపోయిన బెడ్ మీద పడుకుని చూపించమని పంజాబ్ ఆరోగ్య మంత్రి బలవంతం చేశారు. వైస్ ఛాన్సలర్ ఆ మంత్రికి వివరణ ఇద్దామనుకున్నా.. మంత్రి ఆ డాక్టర్ గారికి అవకాశం ఇవ్వలేదు. బెడ్ పై పడుకుని, వెంటనే లేచి మంత్రికి వివరించడానికి ప్రయత్నించాడు. అయినా మంత్రి వినకుండా “అంతా నీ చేతుల్లోనే ఉంది, నీ చేతుల్లోనే, మీ స్టోర్స్ నాకు చూపించు, నేను దానిని తనిఖీ చేయాలనుకుంటున్నా” అని అడిగాడు. డాక్టర్ రాజ్ బజాదూర్ దేశంలోనే బాగా పేరున్న వెన్నుముక శస్త్ర చికిత్స నిపుణులు.
https://twitter.com/PargatSOfficial/status/1553002184413179905?s=20&t=ZwrkYVzRV_qr95dNA84TUA
ఈ సంఘటన జరిగిన వెంటనే, డాక్టర్ రాజ్ బహదూర్ హాస్పిటల్ బెడ్‌పై పడుకున్న ఫోటోలు, వీడియోలు సోషల్ మీడియాలో బాగా వైరలయ్యాయి.
అయితే ఈ సంఘటన జరిగిన ఒక రోజు తర్వాత, బాబా ఫరీద్ మెడికల్ యూనివర్సిటీ వైస్-ఛాన్సలర్ పదవికి డాక్టర్ బహదూర్ రాజీనామా సమర్పించారు. అంతేకాక అతని రాజీనామా పంజాబ్ రాష్ట్రవ్యాప్తంగా ప్రభుత్వ ఆసుపత్రుల్లో పనిచేస్తున్న అగ్రశ్రేణి వైద్య నిపుణుల రాజీనామాలకు దారితీసింది. డాక్టర్ రాజ్ బహదూర్ రాజీనామా చేసిన కొద్ది సేపటికే అమృత్‌ సర్‌ లోని ప్రభుత్వ వైద్య కళాశాల ప్రిన్సిపాల్ రాజీవ్ దేవగన్ కూడా రాజీనామా చేశారు. గురునానక్ దేవ్ మెడికల్ కాలేజీ మెడికల్ సూపరింటెండెంట్ కేడీ సింగ్ కూడా వెంటనే తన రాజీనామాను పంపారు. వీసీ రాజీనామా చేసిన కొద్ది క్షణాలకే డాక్టర్ రాజ్ బహదూర్ కార్యదర్శి ఓపీ చౌదరి కూడా రాజీనామా చేశారు.
చండీగఢ్‌కు చెందిన ఇండియన్ మెడికల్ అసోసియేషన్ మాజీ వైస్ ప్రెసిడెంట్ డాక్టర్ ఆర్‌ఎస్ బేడీ ఈ ఘటనపై స్పందించారు. మంత్రి ప్రవర్తన చాలా ఖండించదగినది. ఒక వైద్యుడికి ఆసుపత్రిని నడపడానికి అతనికి చాలా సహకారం అవసరం, ఒంటరిగా అతను ఏమీ చేయలేడు. నిధులు అందుబాటులో ఉంటే కొనుగోళ్లు సక్రమంగా జరగుతాయి. నిధులు లేనప్పుడు వీసీని ఎలా నిందిస్తారు? రాష్ట్ర ఆరోగ్య బడ్జెట్ చాలా రాజీ పడింది. కానీ బడ్జెట్ పెంచకుండా సౌకర్యాలను ఆశిస్తున్నారు. అది సాధ్యమేనా?” అతను ప్రశ్నించారు.
పంజాబ్ సివిల్ మెడికల్ సర్వీసెస్ అసోసియేషన్ (పిసిఎంఎస్‌ఎ) డాక్టర్ అఖిల్ సరిన్ కూడా ఆరోగ్య మంత్రి విసి పట్ల అనుచితంగా ప్రవర్తించడాన్ని తీవ్రంగా ఖండించారు. కారణాలేమైనా వీసీ పట్ల అనుచితంగా ప్రవర్తించిన తీరు దారుణమన్నారు.
కాంగ్రెస్ నాయకుడు పర్గత్ సింగ్ మాట్లాడుతూ, ఈ రకమైన ప్రవర్తన మన వైద్య సిబ్బందిని నిరుత్సాహపరుస్తుందని అన్నారు.
~ Chada Sastry
